Մարզային միջոցառում. Երկօրյա մասնագիտական հանդիպում մարզային բիզնեսների ներկայացուցիչների հետ

«Ֆինանսավորում, աջակցության ծրագրեր և նորարար թվային գործիքներ»

2026 թվականի ապրիլի 11-12-ը Դիլիջանի Բեսթ Վեստերն Փարադայս հյուրանոցում տեղի ունեցավ երկօրյա մասնագիտական միջոցառում՝ «Նոր հնարավորություններ մարզային բիզնեսների համար. Ֆինանսավորում, աջակցության ծրագրեր և նորարար թվային գործիքներ» խորագրով։ 

Միջոցառումը միավորել էր Հայաստանի բոլոր մարզերը ներկայացնող շուրջ 120 մասնակիցների և ոլորտի փորձագետների` քննարկելու փոքր և միջին ձեռնարկությունների զարգացմանն ուղղված արդիական գործիքներն ու հնարավորությունները։

Միջոցառման առաջին հատվածում Հայաստանի ներդրումային խորհրդի փորձագետները ներկայացրեցին փոխվարչապետ Տիգրան Խաչատրյանի գլխավորությամբ գործող ՓՄՁ պետություն-մասնավոր երկխոսության հարթակի շրջանակներում մշակված աջակցության ծրագրերը, օրենսդրական բարեփոխումները և դրանցից օգտվելու ընթացակարգերը։ Մասնավորապես՝

• 0-4% վարկեր փոքր և միջին ձեռնարկությունների համար,

• Սերտիֆիկացման ծախսի 50%-ի չափով փոխհատուցում. Ապրանքների և ընկերությունների սերտիֆիկացման աջակցության ծրագիր,

• Ինչպես մի քանի րոպեում լրացնել դիմում և ստանալ պետությունից յուրաքանչյուր աշխատողի մասով մինչև 500,000 դրամ, եթե աշխատանքի եք վերցրել անփորձ կամ Արցախից բռնի տեղահանված անձ,

• E-commerce-ում աշխատելու պարագայում ԱԱՀ 0% կիրառման նոր փոփոխության ներկայացում,

• Ապրանքների վերադարձի նոր կարգավորումների ներկայացում,

• Համախառն եկամտից մինչև 2.5%-ի չափով նվազեցումներ` պետական բուհերին կամ այլ կրթական հաստատություններին նվիրատվություններ անելու շնորհիվ: 

Հաջորդիվ, Միգրացիայի միջազգային կազմակերպության գործընկերները անդրադարձ կատարեցին Հայաստանում միգրանտ աշխատուժի ներգրավման թեմային՝ ներկայացնելով գործատուների համար առկա հնարավորություններն ու ռիսկերը։ Քննարկումը վարեցին ՄՄԿ խորհրդատու պարոն Սերգեյ Ղազինյանը և ՀՀ ՆԳՆ ՄՔԾ վարչության պետ տիկին Սրբուհի Մինասյանը։

Միջոցառման կարևոր բաղադրիչներից էր բիզնես գործընթացների ավտոմատացման թեման, որի շրջանակում անցկացվեցին գործնական դասընթացներ՝ արհեստական բանականության կիրառման, մարքեթինգի և օպերացիոն արդյունավետության բարձրացման ուղղությամբ։ Դասընթացը վարեցին ռեԱրմենիա ակադեմիայի ներկայացուցիչներ Արշակ Ուլուբաբյանը և Էլլա Մանուկյանը։