ITIF 2026-ը Երևանում համախմբեց հայաստանյան արտադրողներին և միջազգային գնորդների

Հոկտեմբերի 7-9-ը Երևանում կայացավ Միջազգային առևտրի և ներդրումների ֆորումը (ITIF 2026), որը համախմբեց միջազգային դիստրիբյուտորների, ներմուծողների, առևտրային ցանցերի ներկայացուցիչների և հայաստանյան սննդամթերքի ու խմիչքների արտադրողների՝ առևտրային նոր հնարավորություններ բացահայտելու և գործարար կապեր հաստատելու նպատակով։

Հայաստանի ներդրումային խորհրդի կողմից կազմակերպված ֆորումն անցկացվեց հոկտեմբերի 7–9-ը՝ այս տարի կենտրոնանալով Հայաստանի սննդամթերքի և խմիչքների, այդ թվում՝ թարմ մրգերի և բանջարեղենի ոլորտների արտահանման ներուժի ներկայացման և միջազգային շուկաներում հայկական արտադրանքի առաջխաղացման հնարավորությունների վրա։

Ֆորումի պաշտոնական բացման արարողությունը

ITIF 2026-ի պաշտոնական մեկնարկը տրվեց հոկտեմբերի 7-ին՝ Երևանի քաղաքապետարանում կայացած բացման արարողությամբ, որը հյուրընկալել էր Երևանի քաղաքապետարանը։

Բացման արարողության սկզբում ողջույնի խոսքով հանդես եկավ Երևանի քաղաքապետի տեղակալ Լևոն Հովհաննիսյանը՝ ներկայացնելով ֆորումի բացման արարողությունը հյուրընկալող Երևանի քաղաքապետարանը։

Բացման խոսքով հանդես եկան նաև ՀՀ արտաքին գործերի նախարարի տեղակալ Վահան Կոստանյանը, Հայաստանի Հանրապետությունում Միացյալ Թագավորության արտակարգ և լիազոր դեսպան Ն.Գ. Ալեքսանդրա Քոուլը, Վերակառուցման և զարգացման եվրոպական բանկի (ՎԶԵԲ) հայաստանյան գրասենյակի ղեկավար Ռեմոն Զաքարիան և Հայաստանի ներդրումային խորհրդի ղեկավար Հովսեփ Պատվականյանը։

Բացման նիստի շրջանակում Հայաստանի ներդրումային խորհրդի ղեկավար Հովսեփ Պատվականյանը ներկայացրեց նաև TradeArmenia.org հարթակը, որի նպատակն է բարձրացնել հայաստանյան արտադրողների միջազգային ճանաչելիությունը և օտարերկրյա գնորդներին տրամադրել տեղեկատվություն հայկական արտադրանքի ու արտահանման հնարավորությունների վերաբերյալ։

Ֆորումի օրակարգը շարունակվեց երկու պանելային քննարկումներով, որոնք նվիրված էին Հայաստանի միջազգային առևտրային հարաբերությունների զարգացմանը, արտաքին շուկաների հասանելիության ընդլայնմանը և գործարար համագործակցության նոր հնարավորություններին։

Առաջին պանելային քննարկումը՝ «ԵՄ-ի առաջարկը հայկական բիզնեսներին․ առևտուր, ներդրումներ և շուկաների հասանելիություն», անդրադարձավ եվրոպական շուկաներում հայաստանյան բիզնեսի ներգրավվածության ընդլայնման և միջազգային առևտրային կապերի ամրապնդման հնարավորություններին։

Քննարկումը վարում էր Հայաստանի ներդրումային խորհրդի ղեկավար Հովսեփ Պատվականյանը։ Որպես բանախոսներ մասնակցեցին ՀՀ էկոնոմիկայի նախարարի տեղակալ Տիգրան Գասպարյանը, Հայաստանի Հանրապետությունում Էստոնիայի Հանրապետության արտակարգ և լիազոր դեսպան Ն.Գ. Մարգե Մարդիսալու-Կահարը, Հայաստանում Եվրոպական միության պատվիրակության համագործակցության բաժնի ղեկավար Յոհան Հեսսեն և Միջազգային առևտրի կենտրոնի (ITC, Շվեյցարիա) առևտրի և ներդրումների դյուրացման բաժնի ղեկավար Պիեռ Բոնտոնոն։

Երկրորդ պանելային քննարկումը՝ «Ընդլայնելով հորիզոնները․ առևտրի և արտահանման հնարավորությունները Հայաստանում», կենտրոնացած էր հայաստանյան ընկերությունների և միջազգային գնորդների միջև գործարար կապերի հաստատման, առևտրային հարաբերությունների ամրապնդման և արտահանման նոր շուկաների բացահայտման հնարավորությունների վրա։

Քննարկումը վարում էր Հայաստանի ներդրումային խորհրդի ավագ իրավախորհրդատու Հայկ Մալխասյանը։ Որպես բանախոսներ մասնակցեցին Շվեդիայի առևտրի ազգային խորհրդի առևտրային քաղաքականության խորհրդատու Լիլիանա Ռսումովիչը, Արաբական Միացյալ Էմիրություններում գործող Piya International FZE ընկերության խմբի գործադիր տնօրեն Անկիտ Շահը, Հոնկոնգի առևտրի զարգացման խորհրդի (HKTDC)՝ Եվրոպայի, Կենտրոնական Ասիայի և Իսրայելի տարածաշրջանային տնօրեն Քրիս Լոն, ինչպես նաև Հունաստան-Հայաստան առևտրաարդյունաբերական պալատի նախագահ Ակիս Դագազյանը։

Ֆորումի առաջին օրն ամփոփվեց գործարար շփումների և կապերի հաստատման միջոցառմամբ, որի ընթացքում մասնակիցները հնարավորություն ունեցան շարունակելու քննարկումները, փոխանակվելու մասնագիտական տեսակետներով և հաստատելու համագործակցության նոր կապեր։