ՓՄՁ Զարգացման Խորհրդի տարեվերջյան նիստ

Փոխվարչապետ Տիգրան Խաչատրյանի գլխավորությամբ նոյեմբերի 29-ին և դեկտեմբերի 5-ին տեղի են ունեցել Փոքր և միջին ձեռնարկատիրության զարգացման խորհրդի նիստերը: Փոխվարչապետի գլխավորությամբ գործող ՓՄՁ Զարգացման Խորհրդի մասնագիտական աջակցությամբ զբաղվում է ՎԶԵԲ-ի Հայաստանի ներդրումային խորհուրդը՝ Միացյալ Թագավորության կառավարության «Լավ կառավարման հիմնադրամի» աջակցությամբ:

Նիստի ընթացքում կարևորվել է Լեռնային Ղարաբաղից բռնի տեղահանված անձանց տնտեսական գործունեության խթանմանն ուղղված միջոցառումների իրականացումը՝ ընդգծելով այս նպատակով պետական և մասնավոր հատվածի ջանքերի մեկտեղման անհրաժեշտությունը։ Մտքեր են փոխանակվել տեղահանված անձանց մասնագիտական վերապատրաստման ու զբաղվածության ապահովման համար անհրաժեշտ նախադրյալների վերաբերյալ։

Տնտեսավարողների կողմից բարձրորակ մասնագետների պատրաստման ուղղությամբ իրականացվող աշխատանքների համատեքստում անդրադարձ է կատարվել նաև կրթական ծրագրերի իրականացման համար սահմանված որոշ տեխնիկական պահանջների վերանայման հնարավորությանը։ Փոխվարչապետի հանձնարարականով այս մասով հետագա քննարկումներ են իրականացվելու համապատասխան գերատեսչությունների հետ` փոխհամաձայնեցված առաջարկությունների փաթեթ պատրաստելու նպատակով: 

Օրակարգային հաջորդ հարցը վերաբերում էր փորձաքննության արդյունքների համաձայն երկակի նշանակության ապրանքներ չհանդիսացող ապրանքների արտահանման և ռազմական նշանակության ապրանք չհանդիսացող ապրանքների ներմուծման ժամանակ կրկնակի փորձաքննության անհրաժեշտությունը բացառելուն ուղղված կարգավորումների ներդրմանը, որի մասով կարևորվեց առավել ներառական ու լայնածավալ բարեփոխման անհրաժեշտությունը: 

Գնման պայմանագրից ծագող դրամական պահանջի զիջման դիմաց ֆինանսավորման (ֆակտորինգի) պայմանագրի կնքման համար իրավակարգավորումների ներդրման մասով կար ընդհանուր կոնսենսուս: Այս մասով բարեփոխման նախագիծը կշրջանառվի Էկոնոմիկայի նախարարության կողմից: 

Բարեփոխումների հետագա զարգացումներին կարող եք ծանոթանալ` հետևելով էջին: