«Ներգրավեք ֆինանսներ այլընտրանքային ներդրումային գործիքների միջոցով». IC Armenia միջոցառում

Սեպտեմբերի 16-ին «Կոնգրես Երևան» հյուրանոցում տեղի ունեցավ «Ներգրավեք ֆինանսներ այլընտրանքային ներդրումային գործիքների միջոցով. Ինչ է պետք իմանալ» խորագրով միջոցառումը: 

Միջոցառմանը մասնակցել են ՏՏ ոլորտի շուրջ 100 ստարտափներ և այլ ընկերություններ: Միջոցառման ընթացքում ՎԶԵԲ-ի Հայաստանի ներդրումային խորհրդի փորձագիտական թիմը ներկայացրեց փոխարկելի փոխառության (convertible debt), ՍԵՅՖ և քրաուդֆանդինգի վերաբերյալ օրենսդրական փոփոխությունները։ Այս փոփոխությունները մշակվել են ՎԶԵԲ-ի Հայաստանի ներդրումային խորհրդի, Էկոնոմիկայի նախարարության և Կենտրոնական բանկի համատեղ աշխատնանքի շնորհիվ՝ Միացյալ Թագավորության կառավարության «Լավ կառավարման հիմնադրամի» աջակցությամբ։ 

Միջոցառմանը բացման խոսքով հանդես եկավ Վերակառուցման և զարգացման եվրոպական բանկի (ՎԶԵԲ) հայաստանյան գրասենյակի ղեկավար Գեորգի Ախալկացին, ով իր խոսքում նշեց կատարված բարեփոխումների կարևորությունը և նոր հնարավորությունների ստեղծումը.​ «Ստարտափները նորարարության հիմքն են։ Այդուհանդերձ, ֆինանսավորման հասանելիությունը մնում է նրանց ամենամեծ մարտահրավերներից մեկը։ Այլընտրանքային ներդրումային գործիքները` ինչպիսիք են Փոխարկելի փոխառությունը, ՍԵՅՖը և քրաուդֆանդինգ ներդրումները, ուղղակիորեն լուծում են այս խնդիրը՝ բացելով նոր ուղիներ վաղ փուլի ֆինանսավորման համար։ Այս բարեփոխումները արտացոլում են ՎԶԵԲ-ի հանձնառությունը՝ ստեղծելու աջակցող ներդրումային միջավայր, որը հզորացնում է ձեռնարկատերերին, նվազեցնում է ֆինանսական սահմանափակումները և միացնում է Հայաստանի  տնտեսությունը համաշխարհային լավագույն փորձին»:

Մեծ Բրիտանիայի դեսպանության փոխդեսպան Փոլ Մորիսն իր խոսքում նշեց. «Հայաստանը կառուցում է ավելի դինամիկ և ճկուն տնտեսություն, և Միացյալ Թագավորությունը ուրախ է աջակցել այդ վերափոխմանը մեր «Լավ կառավարման հիմնադրամի» միջոցով։ Մենք օգնում ենք զարգացնել ֆինանսավորման նորարարական տարբերակներ, ինչպիսիք են փոխարկելի պարտատոմսերը և քրաուդֆանդինգը։ Այս կերպ, Հայաստանի ներդրումային խորհրդի հետ համատեղ, Միացյալ Թագավորությունը ոչ միայն դիվերսիֆիկացնում է Հայաստանի համար ներդրումային հնարավորությունները, այլև ամրապնդում է կայուն աճի հիմքերը, որը օգուտ կբերի մեր երկու ազգերին»։

Բացման խոսքերը եզրափակեց ՎԶԵԲ–ի Հայաստանի ներդրումային խորհրդի ղեկավար Հովսեփ Պատվականյանը` ընդգծելով, որ. «Մեծ ուրախությամբ հայտնում ենք, որ այլընտրանքային ներդրումային գործիքները՝ ՍԵՅՖ, փոխարկելի փոխառություն և քրաուդֆանդինգ ներդրումները, այսուհետ հասանելի են Հայաստանում։ Այս նոր գործիքները թույլ կտան Հայաստանի 7000-ից ավելի ՏՏ ընկերություններին և տարեկան ստեղծվող 800 նոր ստարտափներին ներգրավել անհրաժեշտ ֆինանսավորում։

Հայաստանի ներդրումային խորհրդի փորձագիտական թիմը շարունակաբար հետևում է կատարված բարեփոխումներին՝ մշտադիտարկելով դրանց արդյունքները։ Մենք լիահույս ենք, որ այս գործիքների ներդրումը զգալիորեն կխթանի ներդրումների ծավալը հայկական ընկերություններում»։