«Աջակցության ծրագրեր, ֆակտորինգ և արտահանման ապահովագրություն արտադրողների համար». միջոցառում

Փետրվարի 17-ին «Կոնգրես Երևան» հյուրանոցում տեղի ունեցավ «Աջակցության ծրագրեր, ֆակտորինգ և արտահանման ապահովագրություն արտադրողների համար» խորագրով միջոցառումը: Միջոցառումը կազմակերպվել է Հայաստանի ներդրումային խորհրդի կողմից` ԱրմՍվիսԲանկի գործընկերությամբ: 

Արտադրությամբ զբաղվող ընկերությունների համար մեկ հարթակում համախմբվել էին մի շարք առանցքային թեմաներ, որոնք ներկայացրեցին Հայաստանի ներդրումային խորհրդի փորձագետները, ԱրմՍվիսԲանկի և Հայաստանի արտահանման ապահովագրական գործակալության ներկայացուցիչները, ինչպես նաև ՎԶԵԲ-ի Փոքր բիզնեսի խորհրդատվության թիմի ներկայացուցիչները։

Միջոցառմանը բացման խոսքով հանդես եկավ Վերակառուցման և զարգացման եվրոպական բանկի (ՎԶԵԲ) հայաստանյան գրասենյակի ղեկավար Գեորգի Ախալկացին, ով իր խոսքում նշեց կատարված բարեփոխումների կարևորությունը և նոր հնարավորությունների ստեղծումը արտադրողների համար.​ «Արտադրողները Հայաստանի տնտեսության առանցքն են և ՎԶԵԲ-ը մշտապես նրանց կողքին է՝ տրամադրելով ոչ միայն ֆինանսավորում, այլև մասնագիտական փորձառություն, աջակցություն բարեփոխումներին և գործընկերային կապեր, որոնք նպաստում են կայուն աճին ու միջազգային մրցունակության ապահովմանը։

Ֆինանսական միջոցներն առավել հասանելի դարձնելու նպատակով՝ բիզնեսները կարող են օգտվել ԵՄ-ն բիզնեսի համար ծրագրի – ՎԶԵԲ-ի վարկային գծից տեղական գործընկեր բանկերի միջոցով՝ ստանալով մինչև 35% հետվճարի (cashback) հնարավորություն՝ համապատասխան ներդրումների հաջող իրականացման դեպքում: Միևնույն ժամանակ, Հայաստանի ներդրումային խորհրդի կողմից վերջերս ընդունված կարևոր կառուցվածքային բարեփոխումները զարգացման և կայուն աճի նոր հորիզոններ են բացում:

Այս ծրագրերն ու բարեփոխումները միասին արտացոլում են ՎԶԵԲ-ի հանձնառությունը՝ խթանելու ՓՄՁ-ների աճը, արդիականացումը և երկարաժամկետ դիմակայունությունը»:

ԱրմՍվիսԲանկի Գործադիր տնօրեն Գևորգ Մաչանյանն իր խոսքում նշեց.  «ԱրմՍվիսԲանկը կարևորում է ֆակտորինգային ծառայությունների և արտահանման ապահովագրության զարգացումը՝ բիզնեսին արագ ֆինանսավորում և կայուն աճ ապահովելու նպատակով։ Մենք մեր հաճախորդներին առաջարկում ենք ժամանակակից լուծումներ՝ նրանց մրցունակությունը բարձրացնելու համար: Մենք նպատակ ունենք նման հանդիպումները դարձնել շարունակական հարթակ բիզնեսի և ֆինանսական ոլորտի միջև համագործակցության ամրապնդման համար՝ ապահովելով գիտելիքի և հնարավորությունների մշտական փոխանակում»:

Բացման խոսքերը եզրափակեց Հայաստանի ներդրումային խորհրդի ղեկավար Հովսեփ Պատվականյանը` ընդգծելով, որ. «Մեր նպատակն է ներկայացնել արտադրողներին բոլոր այն հնարավոր աջակցման ծրագրերն ու պրոդուկտները, որոնք կարող են օգնել թե ֆինանսավորման, այնպես էլ բիզնեսի ընդլայնման, աշխատողների ներգրավման, արտահանման ուղիների ընդլայնման և արտահանման ռիսկերի նվազեցման հարցերում։ Ուրախ ենք նշել, որ վերջին շրջանում հանդիպումները արտադրողների հետ ավելի հաճախակի են դարձել, ինչը հնարավորություն է տալիս քննարկել կարևոր զարգացումներ և նոր հնարավորություններ։

Ներկայացվող ծրագրերի և նոր բարեփոխումների շնորհիվ, արտադրողները կարող են օգտվել, օրինակ, ապրանքների և ընկերությունների սերտիֆիկացման աջակցության ծրագրից՝ ծախսերի 50%-ի չափով փոխհատուցում ստանալու հնարավորությամբ, ինչպես նաև համախառն եկամտից մինչև 2.5%-ի չափով հարկային նվազեցումներ կատարել՝ պետական բուհերին կամ այլ կրթական հաստատություններին կատարած նվիրատվությունների դեպքում, ինչը ուղղակիորեն աջակցում է նրանց ֆինանսական կայունությանը և զարգացման հնարավորություններին»:

Շարունակելով ելույթը, նա նշեց նաև համագործակցության կարևորության մասին. «Մեզ համար կարևոր է, որ միջոցառումներն իրականացվեն համագործակցության շրջանակում մեր գործընկեր բանկերի և այլ ֆինանսական ինստիտուտների հետ. այս անգամ ուրախ ենք համագործակցել ԱրմՍվիսԲանկի հետ՝ կարևորելով համատեղ ջանքերը հայկական արտադրողների զարգացման և հաջողության համար»: