«Այլընտրանքային ներդրումային գործիքները Հայաստանում». IC Armenia միջոցառում

Հուլիսի 1-ին Հոլիդեյ Ինն Երևան հյուրանոցի Երևան սրահում տեղի ունեցավ «Այլընտրանքային ներդրումային գործիքները Հայաստանում» խորագրով մասնագիտական հանդիպում:

ՎԶԵԲ-ի Հայաստանի ներդրումային խորհրդի փորձագիտական թիմի և ՀՀ Էկոնոմիկայի նախարարության կողմից համատեղ մշակված փոխարկելի փոխառության (convertible debt) վերաբերող օրենսդրական փոփոխությունները ընդունվել են Ազգային Ժողովի երկրորդ ընթերցմամբ և ամբողջությամբ: Փոխարկելի փոխառության պայմանագրերը հանդիսանում են միջազգայնորեն տարածում ստացած ներդրումային գործիք, որի միջոցով իրականացվում է ստարտափ և զարգացման նախնական փուլում գտնվող ընկերությունների կամ այլ ընկերությունների ֆինանսավորումը: ՍԵՅՖ պայմանագրերի հետ զուգահեռ այն հատկապես լայնորեն կիրառվում է տեխնոլոգիական ընկերություններում ներդրումների կատարման համար, վենչուրային ֆոնդերի և այլ ներդրողների գործունեության մեջ: Հանդիպման ընթացքում մանրամասն ներկայացվեց Փոխարկելի փոխառության, ՍԵՅՖ և օպցիոնների օրենսդրական փաթեթները:

Օրեսնսդրական փաթեթները համատեղ մշակել են ՀՀ Էկոնոմիկայի նախարարությունը և ՎԶԵԲ-ի Հայաստանի ներդրումային խորհուրդը՝ Միացյալ Թագավորության կառավարության «Լավ կառավարման հիմնադրամի» աջակցությամբ։

Հանդիպմանը մասնակցում էին ֆինանսական ոլորտի ներկայացուցիչներ, ՓՄՁ Զարգացման խորհրդի անդամներ, ինչպես նաև պետական մարմինների ներկայացուցիչներ:

Միջոցառմանը բացման խոսքով հանդես եկավ ՀՀ էկոնոմիկայի նախարարի տեղակալ Լիլյա Սիրականյանը, ով իր խոսքում նշեց. «Այսօրվա միջոցառման թեման առավել քան արդիական է մեր երկրի համար, որն ընտրել է տնտեսական խորքային վերափոխման և ներդրումային միջավայրի հետևողական բարելավման ռազմավարական ուղին։ Ցանկանում եմ վերահաստատել՝ ՀՀ կառավարությունը վճռական է ներդրումային միջավայրի որակական զարգացման հարցում։ Մենք պատրաստ ենք շարունակել համագործակցությունը միջազգային գործընկերների, մասնավոր հատվածի և փորձագիտական համայնքի հետ՝ Հայաստանի կապիտալի շուկան դարձնելու ավելի գրավիչ, մրցունակ և դինամիկ»:

Վերակառուցման և զարգացման եվրոպական բանկի (ՎԶԵԲ) ներկայացուցիչ Աննա Խաչատրյանն իր խոսքում նշեց կատարված բարեփոխումների կարևորությունը և նոր հնարավորությունների ստեղծումը.​«Մինչ այժմ մեր իրավական համակարգում բացակայում էր բավարար հստակություն և մեխանիզմներ՝ փոխարկելի պարտքի արդյունավետ կիրառման համար։ Առաջարկվող բարեփոխումները կթարմացնեն օրենսդրությունը, համահունչ կդարձնեն այն միջազգային լավագույն փորձին և կբացեն նոր հնարավորություններ՝ բիզնեսի ֆինանսավորման համար՝ առանց երկարաժամկետ կայունության վտանգման։ Այս փոփոխությունները վերաբերում են ոչ միայն կապիտալին, այլև վստահությանը, հնարավորություններին և այն միջավայրի ստեղծմանը, որտեղ լավ գաղափարները կարող են ծաղկել»:

Մեծ Բրիտանիայի դեսպանության գործերի ժամանակավոր հավատարմատար Փոլ Մորիսն իր խոսքում նշեց. «Մեծ Բրիտանիան գործընկեների հետ միասին աջակցում է Հայաստանին՝ ներդնելու այլընտրանքային ներդրումային գործիքներ, որոնք ամրացնում են ֆինանսական համակարգը և խթանում տնտեսության աճը։ Օպցիոնների շուկայի զարգացումը, փոխարկելի նոտաների կարգավորման բարելավումը և ՍՊԸ-ներին առնչվող օրենքների արդիականացումը բիզնեսներին տալիս են ավելի ճկուն ֆինանսավորման հնարավորություններ։ Այս փոփոխությունները նվազեցնում են արգելքները ձեռնարկատերերի և ներդրողների համար, արագացնում գործարքները և հեշտացնում բիզնեսի ստեղծումն ու զարգացումը Հայաստանում»։

Բացման խոսքերը եզրափակեց ՎԶԵԲ–ի Հայաստանի ներդրումային խորհրդի ղեկավար Հովսեփ Պատվականյանը` ընդգծելով, որ. «Հայաստանի ներդրումային խորհրդի փորձագիտական թիմը հետևում է կատարված բարեփոխումներին և իրականացնում է մշտադիտարկում՝ հասկանալու դրանց արդյունքներն ու արձագանքները։ ՍԵՅՖ պայմանագրի շրջանակում արդեն իսկ 15-16 տարբեր տեսակի գործարքներ են իրականացվել մի քանի ամիսների ընթացքում, որի շրջանակում 800,000 ԱՄՆ դոլարի ներդրում են ներգրավել փոքր ընկերությունները: 

Վստահ եմ, որ նոր գործիքի՝ փոխարկելի փոխառության ներդրումը լրացուցիչ խթան կհանդիսանա, որպեսզի զգալի ներդրումների ծավալ հնարավոր լինի ներգրավել հայկական ընկերություններում»։