Ընդունված նախագիծ - Բիզնեսից կրթական հաստատություններին նվիրատվություններ կատարելու վերաբերյալ

Ուրախ ենք տեղեկացնել, որ ՓՄՁ պետություն-մասնավոր երկխոսության հարթակում քարտեզագրված և ՀՀ էկոնոմիկայի նախարարության, ՀՀ Պետական Եկամուտների Կոմիտեի և ՎԶԵԲ Հայաստանի ներդրումային խորհրդի փորձագիտական թիմի կողմից մշակված Հարկային օրենսգրքում փոփոխություններ կատարելու նախագիծը` բիզնեսի կողմից պետական ԲՈւՀ-երին, միջին մասնագիտական և հանրակրթական հաստատություններին նվիրատվությունների վերաբերյալ, ընդունվել է Ազգային Ժողովի երկրորդ ընթերցմամբ և ամբողջությամբ:

Նախկինում արված հարցումները ցույց են տվել, որ հայաստանյան ԲՈւՀ-երի համար նվիրատվությունները կարևոր դեր ունեն և նպաստում են ինչպես գույքային բազայի համալրմանը, այնպես էլ լսարանների վերանորոգմանն ու կահավորմանը, լաբորատորիաների ստեղծմանը, բարձրարժեք թվային ծրագրերի հասանելիությանը և ուսման որակի բարելավմաննն ուղղված այլ ակտիվների ձեռքբերմանը։

Պատմենք, թե ինչ է իրենից ներկայացնում ընդունված նախագիծը: Նախկինում ` պետական բուհերին, հանրակրթական հաստատություններին և միջին մասնագիտական հաստատություններին տրվող նվիրատվությունների պարագայում, ընկերությունը կարող էր շահութահարկ վճարողի հարկման բազայից նվազեցնել հարկային տարվա համախառն եկամտի ընդամենը 0.25%։ Ընդունված նախագծով շահութահարկից նվազեցման շեմը բարձրացվել է 10 անգամ և կազմել 2.5%: 

Կարևոր է իմանալ, որ բարեփոխումը վերաբերում է ոչ միայն գումարի տեսքով արված նվիրատվություններին, այլ նաև գույքին, տեխնիկային, կրթաթոշակներին, ուսումնական և լաբորատոր սարքավորումներին, մատուցված ծառայություններին, համատեղ անցկացված միջոցառումներին և այլն։ Ստացվում է, որ եթե ձեր ընկերությունը, օրինակ, պետական որևէ ԲՈՒՀ–ի նվիրաբերել է համակարգիչներ, ապա կարող եք դրանց արժեքը նվազեցնել ձեր համախառն եկամտից` մինչև 2.5%-ի չափով։

Կարգավորման նպատակը կրթության, գիտության ոլորտներում ոչ պետական միջոցների հաշվին իրականացվող ներդրումների աճն է, կրթություն (գիտություն) – բիզնես կապի ամրապնդումը: