ՓՄՁ Զարգացման Ենթախորհրդի 38-րդ նիստ` ՀՀ Էկոնոմիկայի նախարար Գևորգ Պապոյանի գլխավորությամբ

Փետրվարի 12-ին ՀՀ Էկոնոմիկայի նախարար Գևորգ Պապոյանի գլավորությամբ տեղի ունեցավ ՓՄՁ Զարգացման Ենթախորհրդի 38-րդ նիստը:

Նիստի սկզբում Հայաստանի ներդրումային խորհրդի ղեկավար Հովսեփ Պատվականյանը ներկայացրեց նախկինում քննարկված հարցերի կատարման մասին համապարփակ զեկույց: Զեկույցին հաջորդեց օրակարգային հարցերի քննարկումը: 

Օրակարգում ներառված էր երկու հարց, առաջինը` Արտադրական և տրանսպորտի հողերի էներգետիկ նպատակներով/համակցված վերականգնվող էներգետիկայի նպատակով օգտագործումը դյուրացնելու վերաբերյալ հարցն էր («ՀՀ հողային օրենսգրքում փոփոխություն և լրացումներ կատարելու մասին» օրենքի նախագծի վերաբերյալ):

Խոսքը, մասնավորապես, վերաբերում է այն դեպքերին, երբ սեփական սպառման նպատակով արևային կայաններ են տեղադրվում արտադրական տարածքներում, որի համար անհրաժեշտ է փոխել այդ տարածքների՝ էներգետիկայի նպատակով օգտագործվող հատվածների հողի նպատակային նշանակությունը։ Ընդ որում, եթե արևային պանելները տեղադրվում են շենքերի, շինությունների տանիքներին, ապա հողի նպատակային նշանակությունը փոխելու անհրաժեշտություն չի առաջանում։ Միաժամանակ, եթե նույնիսկ մեկ հենասյուն տեղադրվի գետնի վրա, ապա հենասյանը հարող որոշակի մասի հողի նպատակային նշանակությունը պետք է փոխվի «Էներգետիկայի, կապի, տրանսպորտի, կոմունալ ենթակառուցվածքների օբյեկտների հողերի»։ Նախագծով առաջարկվում է թույլատրել արդյունաբերության, ընդերքօգտագործման և այլ արտադրական նշանակության հողերում  էներգետիկ նպատակներով օգտագործվող շենքերի, շինությունների կառուցումը և սպասարկումը, որի դեպքում հողամասի նպատակային նշանակությունը փոփոխված է համարվում պարզեցված կարգով։ 

Ինչպես նաև, առաջարկվում է թույլատրել տրանսպորտի օբյեկտների հողերում վերականգնվող էներգետիկ ռեսուրս (հողմային կամ արևային) օգտագործող կայաններում էլեկտրական էներգիայի արտադրության գործունեությունը՝ պայմանով, որ դա չի խոչնդոտում տվյալ հողերի նպատակային օգտագործմանը որպես տրանսպորտի օբյեկտների հողեր։

Հարցի շուրջ իրենց դիրքորոշումը հայտնեցին Հայաստանի շինարարների միության  ներկայացուցիչ Հրաչյա Մուրադյանը, «Ձեռնարկությունների ինկուբատոր» հիմնադրամի ներկայացուցիչ Արամ Խաչատրյանը,  Հայաստանի ներդրումային խորհրդի ավագ իրավախորհրդատու Հայկ Մալխասյանը: Հարցի շուրջ որևէ առարկություններ չհնչեցին: ՀՀ Էկոնոմիկայի նախարարն ամփոփեց քննարկումը նշելով, որ խորհուրդը դրական դիրքորոշում ունի հարցի շուրջ և նախագիծը կարող է շրջանառվել ըստ սահմանված կարգի: