IC Armenia Գալա Ընթրիք՝ բարեփոխումից մինչև ազդեցություն

Օրենսդրական բարեփոխումներն արդյունավետ են լինում, երբ հիմնված են պետական և մասնավոր հատվածի համագործակցության, երկխոսության և վստահության վրա՝ ներառելով այն դերակատարներին, ում վրա ազդեցություն է ունենում դրանց ընթացքը։ Այս պարզ ճշմարտությունն է հիմք ծառայել վարչապետի որոշմամբ ստեղծված և փոխվարչապետի գլխավորությամբ գործող ՓՄՁ Զարգացման պետություն-մասնավոր երկխոսության հարթակի համար։ Հարթակում ներգրավված են մի կողմից` մասնավոր հատվածը ներկայացնող 11 ասոցիացիա, մյուս կողմից` պետական հատվածը ներկայացնող տարբեր գերատեսչությունների ղեկավարներ, նախարարներ։ Հարթակի փորձագիտական աջակցությամբ զբաղվում է Վերակառուցման և զարգացման եվրոպական բանկի կողմից ձևավորված Հայաստանի ներդրումային խորհրդի` IC Armenia-ի փորձագիտական թիմը։ Յուրաքանչյուր ամիս 11 անդամները ներկայացնում են բիզնեսից հավաքագրված օրենսդրական բնույթի խնդիրներ և քվեարկությամբ որոշում առաջնահերթ քննարկվելիք խնդիրների ցանկը։ Վերջինիս հաջորդում է IC Armenia-ի փորձագիտական թիմի աշխատանքը․ Առաջին փուլով թիմը իրականացնում է հանդիպում-քննարկում բիզնես ասոցիացիայի այն շահառուների հետ, ովքեր ներկայացրել են օրենսդրական խնդիրը։ Հաջորդիվ ձևավորվում է համանման բիզնեսներից բաղկացած ֆոկուսային խումբ, որի շրջանակում վերլուծվում են համապատասխան դրույթները և առաջարկները։ Միջազգային լավագույն փորձի և հավաքագրված տվյալների վերլուծության  հիման վրա՝ IC Armenia-ի թիմը մշակում է օրենսդրական փոփոխությունների նախագիծը և ներկայացնում ՓՄՁ Զարգացման երկխոսության հարթակի մասնավոր հատվածի ներկայացուցիչներին, ինչպես նաև հարթակին կից գործող հարկային, իրավաբանական աշխատանքային խմբերին` ՀՀ Էկոնոմիկայի նախարարության հետ համատեղ։